msd..؛؛؛؛...

السلام عليكم....
حبيت اعرض عليكم موضوع عن احدى اشهر قطع التزويد و اقدمها .. اللي هي ال MSD .
MSD= Multiple Spark Discharge

MSD بالاساس هي شركة تابعة لشركة اكبر اسمها Autotronics Controls Corporation و الام اس دي اساسا تنتج عدد كبير من القطع و خاصة منظم الاشتعال (Ignition system) اللي الشباب يسمونه ال ام اس دي .

اما عن منتجات الشركة: Ignition Systems,Coils,Alternators,Timing Controls,Spark plug Wires,Starters,Fuel Managment

للي ابغي اركز عليه فموضوعي منظم الاشتعال.

بالمختصر. هالقطعة مسؤولة عن تقوية الشرارة و تنظيم الانفجارات فالسلندرات.
و المطلوب من ال ام اس دي .. انه يوفر الشرارة لحرق خليط البترول و الهوا بالكامل فكل السلندرات.

لكل نظام احتراق خصائص معينة. و اللي هي :

1-الجهد الكهربائي المطلوب للتشغيل (operating voltage):
كمية الجهد المطلوبة لتشغيل الجهاز.. فالعادة كل انواع الام اس دي تحتاج الى 12 الى 18 فولت للتشغيل. بس ممكن الجهاز يشتغل على 10 فولت, لكن الناتج بيكون اقل.. لهذا الشركة تعتبر ال 12-18 فولت الكمية المطلوبة عشان اطلع القوة الكاملة من الجهاز.


2-التيار الكهربائي المطلوب للتشغيل (Operating Current) :
و هي كمية التيار المطلوبة للتشغيل. على حسب نوع الجهاز, تختلف من جهاز لين اخر .. بس الاجهزة المتوفره تتطلب من 7.5 امبير حتى 25 امبير , و التيار يزيد كلما يرتفع الار بي ام.

3-طاقة الشرارة(Spark Energy):
و هي الطاقة اللي بتكون موجودة داخل الفراغ فالبلكات(البواجي يسمونها السعوديين)المطلوبة لبدء الاحتراق داخل السلندر و هي بعد الكمية اللي تكون مخزنه فالكاباستر و اللي توصل للكوليل لكل احتراق. اجهزة الام اس دي باختلاف انواعها تنتج ما بين 180 ملي جول الى 700 ملي جول فالانواع الكبيرة و الغير لسيارات الشوارع.

4-الجهد الناتج الاولي(Primary Voltage Output):
كمية الجهد الكهربائي الناتجة من الجهاز و اللي توصل من الام اس دي الى الكويل. و نفس الشي, تختلف من جهاز الى اخر , من 430 فولت الى 630 فولت.

5-الجهد الناتج الثانوي(Secondary Voltage Output):
هني الفرق الاساسي بين انظمة الاشتعال العادية و انظمه الريس بما فيها الام اس دي.
الجهد الناتج الثانوي عبارة عن كمية الجهد المنتوجة عن الام اس دي عقب ما يطلع من الكويل, و هي كمية هائلة من الجهد من 36000 فولت الى 60000 فولت فالاجهزة المتطورة !

6-مدة الشرارة الكلي (Spark Duration)
ما ادري كيف بالضبط اشرحها, المهم انها المدة اللي اتم فيها تتابع الشرارت بدرجات الكرانك. و لكل انظمة الام اس دي تكون 20 درجة . و شي ثاني, ان عدد الشرارات يقل كلما يرتفع الار بي ام. و فيه قانون فيزيائي يقول ان فحال ان الجهد 14 فولت, لكل ميللي ثانية, يكون فيه شرارة وحدة.

الفرق بينه و بين نظام الاشتعال مال الوكالة, ان الام اس دي الجهد الناتج ماله ثابت فكل درجات الار بي ام, على عكس مال الوكالة, انه اول شي يكون الجهد الناتج واطي, و ينقص كلما يرتفع الار بي ام. و نظام الاشتعال مال الوكالة, يوم تزود الموتر ما يقدر يحرق الكمية الزايدة من البترول و الهوا.

انواع الام اس دي المشهورة:
MSD 6AL و MSD Digital-6 و -MSD Digital-7 و -MSD DIS-4


ملاحظة مهمة جدا: نظام الام اس دي يعتبر نظام خطر للغاية, و فيه بعض الناس يقولك ابغى يشوفه شغال ولا لأ الجهاز, ف يبطل واير الكويل و يقربه من حديدة او سكروب و يشوف الشرارة, طبعا هذا غباء لان الجهد و التيار المار يكونو واجد عالي, و قبل ما انه يشويك و بالكامل, هالتيار بامكانه انه يوقف قلبك على طوول مما يسبب الوفاة فاللحظة نفسها. لا تبطل الجهاز او الوايرات و البطارية واصلة , حتى انك لا تشتغل عليه الا عقب فترة لانه كاباستر و يخزن كهربا حتى بدون مرور التيار. لو ما تعرف لا تتفلس عشان ما تعرض عمرك لعواقب وخيمة جدا جدا, و خل واحد مختص يقوم بمعاينة و اصلاح الجهاز او الكويل